Nuptiae Bentivolorum

Post epistulam ad Bartholomeum Calchum:

Quot celebrata fuit genialis pompa diebus,

      Per totidem scripta est hec mihi pompa dies.

Post finem Nuptiarum

Endecasyllabon

Quo tu, quo properas, recens libelle?

Extra limina cur cupis vagari

Intra scrinia cur nequis manere?

Cur limam refugis meumque coelum?

5

Cur optas volitare per tabernas,

Vendi plus minus assibus duobus?

Exi, sed video tibi paratos

Ronchos rhinocerotas et malignos.

Rugoso aut piperi dabis cucullos

10

Aut merces olidas salariorum

Infoelix gremio teges madenti.

Haec incommoda, si sapis, libelle,

Vitabis, via nam tibi parata est:

In Chalci fugito sinum patroni,

15

Qui iam suppetias feret clienti,

Qui te presidio suo fovebit,

Qui doctos amat excolit venustat.

Hunc queras, reverenter hunc adito,

Huic post legitimam osculationem

20

Dices protinus: “O decus bonorum,

Te salvere meus iubet poeta

Et te vivere Nestoris senectam

Et te principibus diu placere

Optat, sisque sui memor precatur”.

25

I iam quo properas, recens libelle.